[00001]    Ιn principium indictionisὰ

[00002]    Εἰς τὴν ἀρχὴν τῆς ἰνδίκτου.

59.673

[00003]    Θαυμασταὶ τῶν ὀρθοδόξων αἱ πανηγύρεις, φαιδραὶ τῶν μαρτύρων αἱ μνῆμαι, ἀνεπαίσχυντοι τῶν εὐσεβῶν αἱ εὐωχίαι.

[00004]    Οὐχ ἑορτάζομεν χρόνον τῶν ἀστάτως κινουμένων·

[00005]    οὐ σεβόμεθα ἐνιαυτὸν, τὴν τῆς ἀνθρώπων ζωῆς δαπάνην·

[00006]    οὐ προσκυνοῦμεν ἀγῶνα τὸν εἰς φθορὰν ἡμᾶς ἕλκοντα·

[00007]    οὐ λατρεύομεν τῇ κτίσει·

[00008]    σύνδουλα γὰρ τὰ γεγονότα·

[00009]    οὐ θεραπεύομεν τὴν ὕλην·

[00010]    ἐξ οὐκ ὄντων γὰρ ὑπέστη·

[00011]    ὡς γὰρ ἀρχὴν γενέσεως ἔσχε ταῦτα, καὶ φθορᾶς ὑπόκεινται τέλει.

[00012]    Οὐ σεβόμεθα οὐρανόν·

[00013]    ὡς καπνὸς γὰρ ἐστερεώθη·

[00014]    οὐ σεβόμεθα στερέωμα·

[00015]    ἐκρυσταλλώθη·

[00016]    οὐ σεβόμεθα τὸ φῶς·

[00017]    λόγῳ γὰρ ἐδημιουργήθη·

[00018]    οὐ σεβόμεθα τὴν σελήνην·

[00019]    σχήματι γὰρ ἐκοσμήθη·

[00020]    οὐ σεβόμεθα τὴν γῆν·

[00021]    ἐξ ὕδατος γὰρ ἀνειλκύσθη·

[00022]    οὐ σεβόμεθα τὸ πῦρ·

[00023]    ὑλικὸν γὰρ τὸ στοιχεῖον·

[00024]    οὐ προσκυνοῦμεν τὸ ὕδωρ·

[00025]    ῥέουσα γὰρ ἡ φύσις·

[00026]    οὐ λατρεύομεν τῷ χρόνῳ·

[00027]    οὐχ ἕστηκε γὰρ, ἀλλ' ἀφίσταται·

[00028]    οὐ σεβόμεθα τὴν ἡμέραν·

[00029]    διατάξει γὰρ δουλεύει.

[00030]    Πάντα χρόνῳ γηρᾷ, καὶ χρόνος μετὰ πάντα γηρᾷ·

[00031]    Θεὸς δὲ μόνος παλαιότητος ἀνώτερος·

[00032]    καὶ δείκνυσιν ἡ τῆς συντελείας ἡμέρα.

[00033]    Ἕλληνες μὲν οὖν καὶ Ἰουδαῖοι, ἀδελφοὶ ἀνομίας, τοῦ διαβόλου τὰ λάφυρα, τῆς ἁμαρτίας τὰ ἔγγονα, τῆς πλάνης τὰ θρέμματα, τῆς δυσσεβείας ἡ πώρωσις, τῆς γεέννης οἱ ναυτολόγοι, οἱ ὄφεις τῆς ἀσεβείας, οἱ υἱοὶ τῆς κατάρας.

[00034]    Οὗτοι ἑορταζέτωσαν δυσσεβῶς, ἐπειδὴ φρονοῦσιν ἀνοσίως.

[00035]    Οἱ μὲν τὴν πλάνην τιμάτωσαν, οἱ δὲ τὸν νόμον πατείτωσαν, καὶ ἑκάτεροι εἰς τὰ πονηρὰ μαθητευέτωσαν·

[00036]    συνήλλαξαν γάρ.

[00037]    Ἰουδαῖοι παρ' Ἑλλήνων ἔμαθον τὴν εἰδωλολατρείαν, καὶ Ἕλληνες παρὰ Ἰουδαίων τὸ προφητοκτονεῖν·

[00038]    οἱ Ἰουδαῖοι γὰρ ἐν τῷ νόμῳ πᾶσαν Ἑλληνικὴν ἐπεδείξαντο πλάνην.

[00039]    Ἀλλὰ γὰρ ἀγανακτεῖς, ὦ Ἰουδαῖε, ταῦτα ἀκούων;

[00040]    Ἐννόησον γὰρ πράξεις, καὶ μὴ χαλέπαινε πρὸς τὰς μέμψεις.

[00041]    Ποῦ γὰρ οὐκ εἰδωλολάτρησας, εἰπέ μοι;

[00042]    Ἐν τῇ ἐρήμῳ μόσχον ἐχάλκευσας, τροπαιοφορούμενος τῷ Βεελφεγὼρ ἐτελέσθης, ἐν τῇ Μωαβίτιδι τῷ Θάματζ προσεκύνησας, ἐν τῇ Παλαιστίνῃ τῷ ∆αγὼν ἐθυσίασας, ἐν Φοινίκῃ τῇ Ἀστάρτῃ ἐλάτρευσας, ἐν αἰχμαλωσίᾳ τῷ Χαμῶς προσεκύνησας.

[00043]    Ἔλειψε τόπος, οὐκ ἔλειψε μύσος.

[00044]    ∆ιὰ τοῦτο καὶ τὰς ἑορτὰς ὑμῶν μισεῖ ὁ ∆εσπότης.

[00045]    Ἄκουε γὰρ τοῦ προφήτου λέγοντος, Μεμίσηκα, ἀπῶσμαι τὰς ἑορτὰς ὑμῶν, καὶ οὐ μὴ εὐφρανθῶ ἐν ταῖς πανηγύρεσιν ὑμῶν.

[00046]    Πᾶσα γὰρ ἑορτὴ Ἰουδαίων φόνους ἐπήγαγε.

[00047]    Νηστεύων, τὸν Ναβουθὲ ἐλίθασας·

[00048]    ἑορτάζων, τὸν Ἡσαΐαν ἔπρισας·

[00049]    πανηγυρίζων, τὸν Ἱερεμίαν εἰς λάκκον κατέῤῥιψας.

[00050]    Εἰς κρί ^[59.674] σεις καὶ μάχας ἀνοσίως ἐνήστευσας·

[00051]    κραιπαλῶν τὴν κιβωτὸν ἐπὶ τοῦ Ἠλὶ παρέδωκας, τὸν Ἰωάννην ἀπεκεφάλισας.

[00052]    Εἰ τοιαῦτα ἑορτάζεις, τὸ θρηνεῖν σοι συμφέρει.

[00053]    Ἡμεῖς δὲ ἑορτάζομεν θεῖα καὶ παράδοξα πράγματα, τῶν μαρτύρων τοὺς ἄθλους, τῶν ταφέντων τὰς νίκας, τῶν μὴ ὁρωμένων τὰ δίκτυα, τῶν διαλυθέντων τὴν ἰατρείαν·

[00054]    ἐν πρώτοις τοῦ Χριστοῦ καὶ Θεοῦ μου τὰ θαύματα, ἃ διὰ τὴν ἐμὴν σωτηρίαν ἄνθρωπος γεγονὼς ἐξετέλεσεν·

[00055]    εἶθ' οὕτω τῶν δούλων αὐτοῦ τὰ πάθη·

[00056]    τοῦ Στεφάνου τὸν λιθοκόλλητον στέφανον, τοῦ ἐνδόξου Λαυρεντίου τὰ κατὰ θανάτου τρόπαια, τῆς Ἄννης τὴν ἀναυάγητον παρθενίαν.

[00057]    Ὢ τριὰς Τριάδος κήρυξ! ὢ λείψανα τῶν ὀδυνωμένων τὰ φάρμακα! ὢ κόνις πηγὴ ἰαμάτων! ὢ οἶκος οὐρανοῦ τὸ κάλλος μιμούμενος! Ἀλλὰ καὶ τὸ ἄψυχον στοιχεῖον ἡ θάλασσα ἀλαλήτως βοᾷ πρὸς ὑμᾶς.

[00058]    Ἔλεγξας τοὺς συνδούλους, κηρύξω κἀγὼ τὸν ∆εσπότην.

[00059]    Οὐ βαρεῖ με τὸ ἴχνος τοῦ πλάστου, ἁγιάζουσί με οἱ πόδες Χριστοῦ.

[00060]    Μωϋσῆς ἔσχισεν, ἀλλ' οὗτος ἡγίασε·

[00061]    Επιτρέπετα

[00062]    τὸν Ἰωνᾶν ἐῤῥόφησα, τοῦτον δὲ φρίττω·

[00063]    τὸν Νῶε ἐκλυδώνησα, ἀλλ' οὐ τολμῶ προσβλέψαι τῷ χερσὶ τὸν ἄνθρωπον πλάσαντι.

[00064]    Ποσὶ τὴν θάλασσαν ἡγίασε, τὸν οὐρανὸν τῷ θρόνῳ ἐδόξασε, τὴν γῆν τῇ φάτνῃ ἐλάμπρυνε, τὸν ᾅδην διὰ τοῦ τάφου ἐφώτισεν.

[00065]    Οὐκ εἰμὶ ἀγνώμων καὶ ἄψυχος·

[00066]    ἐπιγινώσκω ὡς στοιχεῖον τὸν ποιήσαντα·

[00067]    οὐ λέγω μετὰ τῶν Ἰουδαίων, Οὗτος ὁ ἄνθρωπος οὐκ ἔστι παρὰ Θεοῦ·

[00068]    ἀλλὰ κράζω εὐσεβοῦσα, Οὗτός μου Θεὸς, καὶ δοξάσω αὐτόν.

[00069]    ∆είξω τὰ τῆς ἐμῆς φύσεως, ἐλέγξω τῶν μιαιφόνων τὰς γνώμας, δημοσιεύσω τοῦ περιπατήσαντός με τὸ κράτος.

[00070]    Οὗτοι σύνδουλοι, ἐκεῖνος ∆εσπότης, οὗ φόβῳ τούτους ταράττω.

[00071]    Ὁ μὲν ∆εσπότης ἐν τῇ θαλάττῃ ἀβρόχως ἐβάδιζεν, οἱ δὲ πλέοντες ἐθορυβοῦντο·

[00072]    ὁ δὲ φόβος τοὺς κινδυνεύοντας βοᾷν παρεσκεύασεν, ὁ δὲ φιλάνθρωπος τὸ θαῤῥεῖν παρεκελεύετο λέγων·

[00073]    Θαρσεῖτε, ἐγώ εἰμι, μὴ φοβεῖσθε.

[00074]    Θαρσεῖτε τὴν τῆς πίστεως ἔχοντες ἄγκυραν·

[00075]    εἰδωλολατρείας γὰρ σπιλὰς οὐκ ἐβύθισεν ὑμᾶς·

[00076]    θαρσεῖτε, Ἰουδαϊκὴ ὑμᾶς λαῖλαψ οὐ κατεπόντισε·

[00077]    θαρσεῖτε, αἱρετικὴ ὑμᾶς τρικυμία οὐ κλυδωνίζει.

[00078]    Ἐγώ εἰμι, ὁ συνάναρχος τοῦ Πατρὸς Λόγος, τῆς ἀκτίστης ἀρχῆς ὁ κλάδος, τῆς κοσμικῆς ἁμαρτίας ὁ ἀμνὸς, τοῦ τῶν πόλεων ναυαγίου ὁ κυβερνήτης, τῆς ὀρθοδόξου πίστεως ὁ θησαυρὸς, τῶν μαρτυρικῶν ἀγώνων ὁ βραβευτής.

[00079]    Ἐγώ εἰμι, μὴ φοβεῖσθε.

[00080]    Ὅπου γὰρ ὁ Θεὸς πάρεστιν, ἀπελήλατο κίνδυνος χάριτι Θεοῦ·

[00081]    αὐτῷ ἡ δόξα καὶ τὸ κράτος εἰς τοὺς αἰῶνας τῶν αἰώνων.

[00082]    Ἀμήν.

[00083]    Επιτρέπετα

© 2006 Cooperatorum Veritatis Societas quoad hanc editionem iura omnia asservantur.
0345-0407 - Iohannes Chrysostomus - In principium indictionis [2]
Litterarum Omnium Conspectus: 108 Litterae, quae repetitae sunt in 3,634 occasionibus